ಕರ್ನಾಟಕದ ಕೊರೊನಾ ಸೋಂಕಿತ ಗರ್ಭಿಣಿ ಗುಣಮುಖ: ಮನೆಗೆ ವಾಪಸ್‌

ನಗರದ ಡಾ. ಟಿ. ಎಂ. ಎ. ಪೈ ಕೋವಿಡ್ 19 ಆಸ್ಪತ್ರೆಗೆ ದಾಖಲಾಗಿದ್ದ ಭಟ್ಕಳದ 26ರ ಹರಯದ ಗರ್ಭಿಣಿ ಗುಣಮುಖರಾಗಿ ಬಿಡುಗಡೆಯಾಗಿದ್ದಾರೆ.

ಈ ಸಂಬಂಧ ಮಾತನಾಡಿದ ಜಿಲ್ಲಾಕಾರಿ ಜಿ. ಜಗದೀಶ್, ಉಡುಪಿ ಜಿಲ್ಲೆಯ ಕೀರ್ತಿ ಕಿರೀಟಕ್ಕೆ ಶುಕ್ರವಾರ ಮತ್ತೊಂದು ಗರಿ ಸೇರಿದೆ. ಉತ್ತರ ಕನ್ನಡ ಜಿಲ್ಲೆಯ ಕೊರೊನಾ ಸೋಂಕಿತ ಗರ್ಭಿಣಿಗೆ ಅಲ್ಲಿ ಚಿಕಿತ್ಸೆ ನೀಡುವುದು ಕಷ್ಟಕರ, ಮಗುವನ್ನು ಉಳಿಸುವ ಸವಾಲಿನ ನೆಲೆಯಲ್ಲಿ ಅಸಹಾಯಕತೆ ವ್ಯಕ್ತಪಡಿಸಿದ್ದರು.

ಇನ್ನು, ಉಡುಪಿ ಜಿಲ್ಲೆಯ ರೋಗಿಗಳಿಗೆ ಮಾತ್ರ ಚಿಕಿತ್ಸೆಗೆ ಸೀಮಿತ ಒಪ್ಪಂದದ ನೆಲೆಯಲ್ಲಿ ಡಾ. ಟಿ. ಎಂ. ಎ. ಪೈ ಕೋವಿಡ್ 19 ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲು ನಿರಾಕರಿಸಿದರೂ ಸಿಎಂ ಯಡಿಯೂರಪ್ಪ, ಮುಖ್ಯ ಕಾರ್ಯದರ್ಶಿಯ ಸೂಚನೆಯಂತೆ ಆಸ್ಪತ್ರೆಯ ಆಡಳಿತ ಮಂಡಳಿ ಜತೆ ಮಾತನಾಡಿ, ಚಿಕಿತ್ಸೆ ನೀಡಲು ಒಪ್ಪಿಗೆ ಸೂಚಿಸಲಾಗಿತ್ತು.ಇದೀಗ ಗರ್ಭಿಣಿ ಆರೋಗ್ಯವಾಗಿ ತೆರಳುತ್ತಿರುವುದು ಖುಷಿ ತಂದಿದೆ ಎಂದು ಜಗದೀಶ್ ಹೇಳಿದ್ದಾರೆ.

ಇನ್ನೊಂದೆಡೆ, ಭಟ್ಕಳದಿಂದ ಉಡುಪಿ ಆಸ್ಪತ್ರೆಗೆ ಬರುವಾಗ ನನಗೆ ತುಂಬಾ ಹೆದರಿಕೆ ಜತೆಗೆ ಆತಂಕವಾಗಿತ್ತು. ಕೋವಿಡ್ 19 ಆಸ್ಪತ್ರೆಯಲ್ಲಿ ಉತ್ತಮ ಚಿಕಿತ್ಸೆ ಜತೆಗೆ ವೈದ್ಯರು ದಾದಿಯರು, ನಿರೀಕ್ಷೆಗೂ ಮಿಗಿಲಾದ ಅನನ್ಯ ಸೇವೆ ನೀಡಿದ್ದಾರೆ. ಮನೆಯಂತಹ ವಾತಾವರಣ ಕಲ್ಪಿಸಿದ್ದು ಪೂರ್ಣ ಗುಣಮುಖಳಾಗಿ ಮನೆಗೆ ತೆರಳುತ್ತಿದ್ದು ಜಿಲ್ಲಾಡಳಿತ ಸಹಿತ ಎಲ್ಲರಿಗೂ ಕೃತಜ್ಞತೆ ಸಲ್ಲಿಸುವೆ ಎಂದು ಗರ್ಭಿಣಿ ತನ್ನ ಆಡಿಯೋ ಸಂದೇಶದಲ್ಲಿ ಆಸ್ಪತ್ರೆಯಿಂದ ಬಿಡುಗಡೆಯಾದ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದಾರೆ.

ಏಪ್ರಿಲ್‌ 9ರಂದು ಉಡುಪಿಯ ಕೋವಿಡ್ 19 ಆಸ್ಪತ್ರೆಗೆ ದಾಖಲಾಗಿದ್ದ ಮಹಿಳೆ, ಮೊದಲ ವರದಿ ಏಪ್ರಿಲ್‌ 21 ಹಾಗೂ ಎರಡನೇ ವರದಿ ಗುರುವಾರ ಏಪ್ರಿಲ್‌ 23ರಂದು ಬಂದಿದ್ದು, ಎರಡೂ ನೆಗೆಟಿವ್ ಆಗಿರುವ ಹಿನ್ನೆಲೆಯಲ್ಲಿ ಎಲ್ಲಾ ಪ್ರಕ್ರಿಯೆ ಮುಗಿಸಿ ಆಸ್ಪತ್ರೆಯಿಂದ ಬಿಡುಗಡೆ ಮಾಡಲಾಗಿದೆ ಎಂದು ಕೋವಿಡ್ 19 ನೋಡೆಲ್ ಅಧಿಕಾರಿ ಡಾ. ಪ್ರಶಾಂತ್ ಭಟ್ ತಿಳಿಸಿದ್ದಾರೆ.

ಸುಳ್ಳು ಸುದ್ದಿಗಳ ವಿರುದ್ಧದ ಹೋರಾಟಕ್ಕೆ ದೇಣಿಗೆ ನೀಡಿ ಬೆಂಬಲಿಸಿ
Spread the love

Leave a Reply

Your email address will not be published.

Verified by MonsterInsights