ಸಂಭವನೀಯ ಕೊರೊನ ಲಸಿಕೆ ಅಭಿವೃದ್ಧಿಪಡಿಸಿದ ಹೈದರಾಬಾದ್ ವಿಶ್ವವಿದ್ಯಾಲಯ ಸಂಶೋಧಕರು
ಕೊರೊನ ಸೋಂಕಿಗೆ ಸಂಭವನೀಯ ಲಸಿಕೆ ಎನ್ನಲಾಗಿರುವ ಟಿ-ಸೆಲ್ ಎಪಿಟೋಪ್ಸ್ ನನ್ನು ಹೈದರಾಬಾದ್ ವಿಶ್ವವಿದ್ಯಾಲಯ ಅಭಿವೃದ್ಧಿಪಡಿಸಿದೆ. ಇದರ ಬಗ್ಗೆ ವೈಜ್ಞಾನಿಕ ಸಮುದಾಯದಲ್ಲಿ ಇನ್ನೂ ಹೆಚ್ಚಿನ ಸಂಶೋಧನೆಗಾಗಿ ವಿಶ್ವವಿದ್ಯಾಲಯ ತನ್ನ ಅಧ್ಯಯನವನ್ನು ಪ್ರಕಟ ಮಾಡಿದೆ.
ಜೀವ ವಿಜ್ಞಾನಗಳ ಬಯೋಕೆಮಿಸ್ಟ್ರಿ ವಿಭಾಗದ ಸೀಮಾ ಮಿಶ್ರ ಈ ಸಂಶೋಧನೆಯಲ್ಲಿ ಮುಖ್ಯ ಪಾತ್ರ ವಹಿಸಿದ್ದು, ಮಾನವನ ಕೋಶಗಳನ್ನು ಮತ್ತು ಪ್ರೋಟೀನ್ ಗಳನ್ನು ವೈರಾಣುಗಳಿಂದ ರಕ್ಷಿಸುವಲ್ಲಿ ಈ ಲಸಿಕೆ ಯಶಸ್ವಿಯಾಗಲಿದೆ ಎಂದು ವಿಶ್ವವಿದ್ಯಾಲಯದ ಮೂಲಗಳು ತಿಳಿಸಿವೆ. ಇದು ಪರೀಕ್ಷೆಗಳ ಮೂಲಕ ಸಾಬೀತಾಗಬೇಕಿದೆ.
ಕೊರೊನ ವೈರಸ್ ಮತ್ತು ಅದರ ಲಸಿಕೆಯ ಬಗ್ಗೆ ಭಾರತದಲ್ಲಿ ನಡೆಯುತ್ತಿರುವ ಮೊದಲ ಸಂಶೋಧನೆ ಇದು ಎಂದು ವಿಶ್ವವಿದ್ಯಾಲಯ ಮೂಲಗಳು ತಿಳಿಸಿವೆ. “ಸದ್ಯಕ್ಕೆ ಕೊರೊನ ಇಂದ ರಕ್ಷಣೆಗೆ ಅತ್ಯುತ್ತಮ ಮಾರ್ಗ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದು. ಇನ್ನೂ ಪರೀಕ್ಷೆಗಳು ನಡೆಯಬೇಕಿರುವುದರಿಂದ ಲಸಿಕೆ ಪೂರ್ಣ ಪ್ರಮಾಣದಲ್ಲಿ ಅಭಿವೃದ್ಧಿ ಆಗುವುದಕ್ಕೆ ಸಮಯ ತೆಗೆದುಕೊಳ್ಳಲಿದೆ. ಇದರ ಬಗ್ಗೆ ನಮಗೆ ನಂಬಿಕೆ ಇದೆ” ಎಂದು ವಿಶ್ವವಿದ್ಯಾಲಯ ಹೇಳಿಕೆಯಲ್ಲಿ ತಿಳಿಸಿರುವುದಾಗಿ ದ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಮಾಡಿದೆ.
