“ಮುಂದಿನ ಕೆಲ ದಿನಗಳಲ್ಲಿ ನಮ್ಮ ದೇಶವಾಸಿಗಳಿಗೆ ಕೋವಿಡ್-19 ಲಸಿಕೆ”: ಹರ್ಷ ವರ್ಧನ್
ಕೋವಿಡ್-19 ಲಸಿಕೆ ಮುಂದಿನ ಕೆಲ ದಿನಗಳಲ್ಲಿ ನಮ್ಮ ದೇಶವಾಸಿಗಳಿಗೆ ಲಭ್ಯವಾಗುವಂತೆ ಮಾಡಬಹುದೆಂದು ಕೇಂದ್ರ ಆರೋಗ್ಯ ಸಚಿವ ಡಾ.ಹರ್ಷ್ ವರ್ಧನ್ ಹೇಳಿದ್ದಾರೆ. ಈ ಮಧ್ಯೆ ವ್ಯಾಕ್ಸಿನೇಷನ್ ಕಾರ್ಯಕ್ರಮದ ಪ್ರತಿಯೊಂದು ವಿವರವನ್ನು ಜನರಿಗೆ ತಿಳಿಸಲು, ರಾಷ್ಟ್ರಮಟ್ಟದಿಂದ ತಳಮಟ್ಟದವರೆಗೆ ಸರ್ಕಾರ ಖಾತ್ರಿಪಡಿಸಿದೆ ಎಂದು ಅವರು ಹೇಳಿದ್ದಾರೆ.
ಈಗಾಗಲೇ ಕೆಲ ರಾಜ್ಯಗಳಲ್ಲಿ ಕೊರೊನಾ ವ್ಯಾಕ್ಸಿನ್ ಡ್ರೈರನ್ ಆರಂಭಗೊಂಡಿದೆ. ಮೊದಲ ಹಂತದಲ್ಲಿ ವೈದ್ಯರು, ನರ್ಸಗಳು, ಕೊರೊನಾ ವಾರಿಯರ್ಸ್ ಹಾಗೂ ವಯಸ್ಕರಿಗೆ ಲಸಿಕೆ ನೀಡಲು ಸರ್ಕಾರ ತೀರ್ಮಾನಿಸಿದೆ.
“ಅಲ್ಪಾವಧಿಯಲ್ಲಿಯೇ ಲಸಿಕೆಗಳನ್ನು ಅಭಿವೃದ್ಧಿಪಡಿಸುವ ಮೂಲಕ ಭಾರತ ಉತ್ತಮ ಸಾಧನೆ ಮಾಡಿದೆ. ಮುಂದಿನ ದಿನಗಳಲ್ಲಿ, ಮುಂದಿನ ಕೆಲ ದಿನಗಳಲ್ಲಿ ಲಸಿಕೆಯನ್ನು ನಮ್ಮ ದೇಶವಾಸಿಗಳಿಗೆ ನೀಡಲು ಸಾಧ್ಯವಾಗುತ್ತದೆ. ಇದನ್ನು ಮೊದಲು ನಮ್ಮ ಆರೋಗ್ಯ ವೃತ್ತಿಪರರಿಗೆ ನೀಡಲಾಗುವುದು ಮತ್ತು ನಂತರ ಕಾರ್ಮಿಕರಿಗೆ ನೀಡಲು ನಿರ್ಧರಿಸಲಾಗಿದೆ ” ಎಂದು ಎಎನ್ಐ ಪ್ರಕಾರ ಸಚಿವ ವರ್ಧನ್ ಹೇಳಿದ್ದಾರೆ.
“ಲಸಿಕೆ ನೀಡುವ ಪ್ರಕ್ರಿಯೆಯ ಬಗ್ಗೆ ಲಕ್ಷಾಂತರ ಆರೋಗ್ಯ ಕಾರ್ಯಕರ್ತರಿಗೆ ತರಬೇತಿ ನೀಡಲಾಗುತ್ತಿದೆ, ಮತ್ತು ಹೆಚ್ಚಿನ ತರಬೇತಿ ನೀಡುವ ಪ್ರಕ್ರಿಯೆಯು ಇನ್ನೂ ನಡೆಯುತ್ತಿದೆ” ಎಂದಿದ್ದಾರೆ.
ಡ್ರೈ ರನ್ ಡ್ರಿಲ್ನ ಮೇಲ್ವಿಚಾರಣೆಗೆ ಸಚಿವರು ತಮಿಳುನಾಡಿನಲ್ಲಿದ್ದಾರೆ. ಚೆನ್ನೈನ ಇತರ ಸ್ಥಳಗಳಾದ ಒಮಾಂಡುರಾರ್ ಆಸ್ಪತ್ರೆ, ಅಪೊಲೊ ಆಸ್ಪತ್ರೆ ಮತ್ತು ಚೆಂಗಲ್ಪಟ್ಟಿಗೆ ಭೇಟಿ ನೀಡಲು ನಿರ್ಧರಿಸಲಾಗಿದೆ. 33 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ 736 ಜಿಲ್ಲೆಗಳ ಮೂರು ಅಧಿವೇಶನಗಳಲ್ಲಿ ಇಂದು ರಾಷ್ಟ್ರವ್ಯಾಪಿ ಎರಡನೇ ಅಣಕು ಡ್ರಿಲ್ ನಡೆಯುತ್ತಿದೆ.

