ದಾಖಲೆ ಸೃಷ್ಟಿಸಿದ ಟೀಸರ್ : ಕೆಜಿಎಫ್ 2 ಹಿಂದಿ ವರ್ಷನ್ ಗೆ ದೊಡ್ಡ ಮೊತ್ತದ ಬೇಡಿಕೆ..!
ಬಾಲಿವುಡ್ ನಲ್ಲಿ ಧೂಳೆಬ್ಬಿಸಿದ್ದ ಕೆಜಿಎಸ್ 2 ಟೀಸರ್ ಸಿನಿಮಾ ಬಗ್ಗೆ ಭಾರೀ ನಿರೀಕ್ಷೆಯನ್ನು ಮೂಡಿಸಿದೆ. ಜೊತೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಟೀಸರ್ ಭಾರೀ ಸದ್ದು ಮಾಡಿದ್ದು ಸಿನಿಮಾ ಬೇಡಿಕೆ ಕೂಡ ಹೆಚ್ಚಾಗಿದೆ.
ಈ ಹಿಂದೆ ಯಾವ ಭಾರತೀಯ ಚಿತ್ರವೂ ಮಾಡದ ದಾಖಲೆಗಳನ್ನು ಕೆಜಿಎಫ್ 2 ಟೀಸರ್ ಮಾಡಿದೆ. ಕೇವಲ ಭಾರತೀಯ ಮಟ್ಟದಲ್ಲಿ ಮಾತ್ರವಲ್ಲ, ವಿಶ್ವಮಟ್ಟದಲ್ಲಿ ರೆಕಾರ್ಡ್ ಕ್ರಿಯೇಟ್ ಮಾಡಿದೆ. ಹೀಗಾಗಿ ಕೆಜಿಎಫ್ ಅಧ್ಯಾಯ 2 ರ ನಿರ್ಮಾಪಕರು ಹಿಂದಿ ವರ್ಷನ್ ಮಾರಾಟ ಮಾಡಲು ದೊಡ್ಡ ಮೊತ್ತದ ಬೇಡಿಕೆಯನ್ನು ಇಟ್ಟಿದ್ದಾರೆ.
ಕೆಜಿಎಫ್ ಅಧ್ಯಾಯ 1 ರ ಹಿಂದಿ ವರ್ಶನನ್ನು ಫರ್ಹಾನ್ ಅಖ್ತರ್ ಮತ್ತು ರಿತೇಶ್ ಸಿಧ್ವಾನಿ ಅವರ ನಿರ್ಮಾಣ ಸಂಸ್ಥೆ ಎಕ್ಸೆಲ್ ಎಂಟರ್ಟೈನ್ಮೆಂಟ್ ಖರೀದಿಸಿತ್ತು. ಚಲನಚಿತ್ರದ ಎರಡನೇ ಭಾಗದ ಹಿಂದಿ ವರ್ಶನ್ ಸಹ ಅದೇ ಪ್ರೊಡಕ್ಷನ್ ಹೌಸ್ ಖರೀದಿಸುತ್ತಿದೆ. ಇದಕ್ಕಾಗಿ ಫರ್ಹಾನ್ ಅಖ್ತರ್ ಭಾರಿ ಮೊತ್ತವನ್ನು ನೀಡಿದ್ದಾರೆ ಎಂದು ಇತ್ತೀಚಿನ ವರದಿಗಳು ತಿಳಿಸಿವೆ.
ಫರ್ಹಾನ್ ಅಖ್ತರ್ ಮತ್ತು ರಿತೇಶ್ ಸಿಧ್ವಾನಿ ಅವರ ಎಕ್ಸೆಲ್ ಎಂಟರ್ಟೈನ್ಮೆಂಟ್ ಹಿಂದಿ ಕೆಜಿಎಫ್ ಅಧ್ಯಾಯ 2 ಸಿನಿಮಾಕ್ಕೆ ಸುಮಾರು 90 ಕೋಟಿ ರೂ. ನೀಡಿದ್ದಾರೆ ಎನ್ನಲಾಗುತ್ತಿದೆ. ಇಲ್ಲಿ ಆಶ್ಚರ್ಯವೇನೆಂದರೆ ಚಿತ್ರದ ಮೊದಲ ಭಾಗದಲ್ಲಿ ನಿರ್ಮಾಪಕರು ಕೇವಲ 43.9 ಕೋಟಿ ರೂ.ಗೆ ಮಾರಾಟ ಮಾಡಿದ್ದು ಗಮನಾರ್ಹ ಸಂಗತಿ. ಜನವರಿ 7ರ ರಾತ್ರಿ 9.29ಕ್ಕೆ ಹೊಂಬಾಳೆ ಫಿಲಂಸ್ ಯ್ಯೂಟ್ಯೂಬ್ ವಾಹಿನಿಯಲ್ಲಿ ತೆರೆಕಂಡಿದ್ದ ಟೀಸರ್ ಆರಂಭದ 49 ನಿಮಿಷದಲ್ಲಿ 5 ಮಿಲಿಯನ್ ವೀಕ್ಷಣ ಕಂಡಿತ್ತು. ಬಳಿಕ 12 ಗಂಟೆಯಲ್ಲಿ 25 ಮಿಲಿಯನ್ ವೀಕ್ಷಣೆ ಕಂಡಿದೆ.ಇದು ಯೂಟ್ಯೂಬ್ನಲ್ಲಿ 160 ದಶಲಕ್ಷಕ್ಕೂ ಹೆಚ್ಚು ವೀಕ್ಷಣೆಗಳನ್ನು ಪಡೆದಿದೆ. ಟೀಸರ್ ವಿಶ್ವಾದ್ಯಂತ ಹೆಚ್ಚು ವೀಕ್ಷಿಸಿದ ಟೀಸರ್ ಆಗಿ ಮಾರ್ಪಟ್ಟಿದೆ.
ಪ್ರಶಾಂತ್ ನೀಲ್ ನಿರ್ದೇಶನದಲ್ಲಿ, ಸಂಜಯ್ ದತ್, ರವೀನಾ ಟಂಡನ್, ಮತ್ತು ಪ್ರಕಾಶ್ ರಾಜ್ ಅವರಂತಹ ಹಲವಾರು ತಾರೆಯರು ‘ಕೆಜಿಎಫ್ ಅಧ್ಯಾಯ 2’ ಚಿತ್ರದಲ್ಲಿ ವೈಭವದೊಂದಿಗೆ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರದಲ್ಲಿ ಸಂಜಯ್ ದತ್ ಮುಖ್ಯ ಖಳನಾಯಕ ಅಧಿರಾ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಕನ್ನಡದಲ್ಲಿ ತಯಾರಾಗುತ್ತಿರುವ ಈ ಚಿತ್ರ ತೆಲುಗು, ತಮಿಳು, ಹಿಂದಿ ಹಾಗೂ ಮಲಯಾಳಂ ಭಾಷೆಯಲ್ಲಿ ಬಿಡುಗಡೆಯಾಗಲಿದೆ.