FACT CHECK | ಪಾಕ್‌ನಲ್ಲಿ ಹೆಣ್ಣು ಶವಗಳ ಮೇಲೆ ಅತ್ಯಾಚಾರ ನಡೆಸುವುದನ್ನು ತಡೆಯಲು, ಕುಟುಂಬಸ್ಥರು ಸಮಾಧಿಗಳಿಗೆ ಬೀಗ ಹಾಕಿದ್ದಾರೆ ಎಂಬುದು ನಿಜವೇ?
ಸಾಮಾಜಿಕ ಮಾಧ್ಯಮಗಳಲ್ಲಿ ಫೋಟೊವೊಂದು ವೈರಲ್ ಆಗುತ್ತಿದ್ದು, ” ಮೃತಪಟ್ಟ ತಮ್ಮ ಹೆಣ್ಣುಮಕ್ಕಳ ಶವಗಳು ಅತ್ಯಾಚಾರಕ್ಕೆ ಒಳಗಾಗುವುದನ್ನು ತಡೆಯಲು ಪಾಕಿಸ್ತಾನದಲ್ಲಿ ಪೋಷಕರು ಸಮಾಧಿಗಳಿಗೆ ಬೀಗ ಹಾಕುತ್ತಿದ್ದಾರೆ ಎಂದು ಪ್ರತಿಪಾದಿಸಿ ಪೋಸ್ಟ್‌ಅನ್ನು ಹಂಚಿಕೊಳ್ಳಲಾಗುತ್ತಿದೆ.
In Pakistan, parents are now putting PADLOCKS on the graves of their dead daughters to prevent them from being dug up and raped.
Western countries have to stop importing millions of men like this, who don’t possess the intellectual capacity to understand that rape is wrong. pic.twitter.com/mzrsfyi4zh
— Cillian (@CilComLFC) July 10, 2024
ಸಾಮಾಜಿಕ ಮಾಧ್ಯಮಗಳಲ್ಲಿ ಅಲ್ಲದೆ ಮುಖ್ಯವಾಹಿನಿಯ ಸುದ್ದಿ ತಾಣಗಳಲ್ಲಿಯೂ ಇದೇ ಸುದ್ದಿಯನ್ನು ಪ್ರಸಾರ ಮಾಡುತ್ತ ” ರೇಪ್‌ನಿಂದ ರಕ್ಷಿಸಲು ಮೃತ ಹೆಣ್ಣು ಮಕ್ಕಳ ಸಮಾಧಿಗೆ ಬೀಗ ಹಾಕಿದ ಪಾಕಿಸ್ತಾನದ ಪಾಲಕರು ಎಂದು ಸುದ್ದಿಯನ್ನು ಬಿತ್ತರಿಸಿವೆ. ಈ ಹಿಂದೆಯೂ ಪಾಕಿಸ್ತಾನದಲ್ಲಿ ಶವ ಸಂಭೋಗದ ಪ್ರಕರಣಗಳು ಹೆಚ್ಚಾಗುತ್ತಿದೆ ಎಂಬ ಸುದ್ದಿಗಳು ಕೇಳಿ ಬಂದಿದ್ದವು.
ಹಾಗಿದ್ದರೆ ಪಾಕಿಸ್ತಾನದಲ್ಲಿ ಇಂತಹ ಘಟನೆಗಳು ನಡೆದಿವೆಯೇ? ಮೃತ ಹೆಣ್ಣು ಮಕ್ಕಳ ಪೋಷಕರು ತಮ್ಮ ಹೆಣ್ಣು ಮಕ್ಕಳ ದೇಹವನ್ನು ಅತ್ಯಾಚಾರದಿಂದ ಕಾಪಾಡಲು ಸಮಾಧಿಗೆ ಬೀಗ ಹಾಕಿದ್ದಾರೆಯೇ ಎಂದು ಪೋಸ್ಟ್‌ನಲ್ಲಿ ಮಾಡಲಾದ ಪ್ರತಿಪಾದನೆ ನಿಜವೇ ಎಂದು ಪರಿಶೀಲಿಸೊಣ.
ಫ್ಯಾಕ್ಟ್‌ಚೆಕ್ :
ಬೀಗ ಹಾಕಿರುವ ಗೋರಿ ಇರುವುದು ಪಾಕಿಸ್ತಾನದಲಲ್ಲ :
ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿರುವ, ಪೋಸ್ಟ್‌ನಲ್ಲಿ ಅಪ್‌ಲೋಡ್‌ ಮಾಡಲಾದ ಫೋಟೊವನ್ನು ಪರಿಶೀಲಿಸಲು ಗೂಗಲ್ ಸರ್ಚ್ ಮಾಡಿದಾಗ, ಸಮಾಧಿಯೊಂದಕ್ಕೆ ಕಬ್ಬಿಣದ ಗ್ರಿಲ್ ಅಳವಡಿಸಿ ಬೀಗ ಹಾಕಿದ್ದ ಫೋಟೋ ಕೂಡ ಫೇಕ್ ಆಗಿದ್ದು, ಆ ಫೋಟೋ ಪಾಕಿಸ್ತಾನದಲ್ಲ. ಅದು ಭಾರತದ ತೆಲಂಗಾಣ ರಾಜ್ಯದ ರಾಜಧಾನಿ ಹೈದರಾಬಾದ್ ನಲ್ಲಿರುವ ಮುಸ್ಲಿಂ ಸಮುದಾಯದ ಸ್ಮಶಾನದಲ್ಲಿರುವ ಗೋರಿಯದ್ದು ಎಂದು ಫ್ಯಾಕ್ಟ್‌ಲಿ ವರದಿ ಮಾಡಿದೆ.
ಬೀಗ ಹಾಕಿರುವ ಈ ಸಮಾಧಿ ಇರುವುದು ತೆಲಂಗಾಣದ ರಾಜಧಾನಿಯಾದ ಹೈದರಾಬಾದ್ ನ ಮದನ್ ಪೇಟ್ ನಲ್ಲಿರುವ ದರದ್ ಜಂಗ್ ಕಾಲೋನಿಯಲ್ಲಿರುವ ಸಲಾರ್ ಮುಲ್ಕ್ ಎಂಬ ಮಸೀದಿಯ ಮುಂಭಾಗದಲ್ಲಿರುವ ಮುಸ್ಲಿಮರ ಸ್ಮಶಾನದಲ್ಲಿ. ಈ ಸ್ಮಶಾನವು ಈ ಮಸೀದಿಯ ಆಡಳಿತ ಮಂಡಳಿಯ ಸುಪರ್ದಿಯಲ್ಲಿದ್ದು, ಯಾರೇ ಶವಸಂಸ್ಕಾರ ಮಾಡಬೇಕಾದರೂ ಮಸೀದಿಯವರಿಂದ ಅನುಮತಿ ಪಡೆದು ಅಲ್ಲಿ ಶವಸಂಸ್ಕಾರ ಮಾಡಬೇಕಿದೆ.
ವಿಶಾಲವಾಗಿರುವ ಈ ಸ್ಮಶಾನಕ್ಕೊಂದು ಕಾಂಪೌಂಡ್ ಇದ್ದು, ಕಾಂಪೌಂಡಿನ ಪ್ರವೇಶ ದ್ವಾರದಲ್ಲಿ ಗೇಟ್ ಅಳವಡಿಸಲಾಗಿದೆ. ಸ್ಮಶಾನಕ್ಕೆ ಪ್ರವೇಶ ಮಾಡುವ ಹಾದಿಯಲ್ಲೇ ಯಾವುದೋ ಒಂದು ಕುಟುಂಬ, ಸುಮಾರು ಎರಡು-ಎರಡೂವರೆ ವರ್ಷಗಳ ಹಿಂದೆ ಮಸೀದಿಯ ಆಡಳಿತ ಮಂಡಳಿಯ ಅನುಮತಿಯಿಲ್ಲದೇ ಅಲ್ಲಿ ತಮ್ಮ ಸಂಬಂಧಿಕರೊಬ್ಬರನ್ನು ದಫನ್ ಮಾಡಿತ್ತು. ಆ ವ್ಯಾಜ್ಯವು ಇಂದಿಗೂ ಆ ಕುಟುಂಬ ಹಾಗೂ ಮಸೀದಿಯ ಆಡಳಿತ ಮಂಡಳಿಯ ನಡುವೆ ನಡೆಯುತ್ತಿದೆ. ಆದರೆ, ಸ್ಮಶಾನ ಪ್ರವೇಶಿಸಿದ ಕೂಡಲೇ ದಾರಿಗೆ ಅಡ್ಡವಾಗಿ ಸಿಗುವ ಈ ಗೋರಿಯ ಮೇಲೆ ಯಾರೂ ಕಾಲಿಟ್ಟುಕೊಂಡು ಓಡಾಡದಿರಲಿ ಎಂದು ಆ ಕುಟುಂಬಸ್ಥರು, ಆ ಗೋರಿಯ ಮೇಲೆ ಕಬ್ಬಿಣದ ಸರಳುಗಳ ಗ್ರಿಲ್ ನಿರ್ಮಿಸಿ ಅದಕ್ಕೆ ಬೀಗವನ್ನೂ ಹಾಕಿದ್ದಾರೆಂದು ಹೇಳಲಾಗಿದೆ. ಹಾಗಾಗಿ ಈ ಚಿತ್ರ ಪಾಕಿಸ್ತಾನಕ್ಕೆ ಸಂಬಂಧಿಸಿದ್ದಲ್ಲ.
ಪಾಕಿಸ್ತಾನದಲ್ಲಿ ಶವಗಳ ಮೇಲೆ ಅತ್ಯಾಚಾರ ನಡೆಸಲಾಗಿತ್ತು
ಪಾಕಿಸ್ತಾನದಲ್ಲಿ ಗೋರಿಗಳಿಂದ ಮಹಿಳೆಯರ ಶವಗಳನ್ನು ಹೊರಗೆ ತೆಗೆದು ಅತ್ಯಾಚಾರ ಎಸಗುವ ಅನೇಕ ಪ್ರಕರಣಗಳು ವರದಿಯಾಗಿದ್ದವು. 2011ರಲ್ಲಿ ಪಾಕಿಸ್ತಾನದಲ್ಲಿ ಮೊದಲ ಶವಕಾಮ ಪ್ರಕರಣ ಬೆಳಕಿಗೆ ಬಂದಿತ್ತು. ಕರಾಚಿಯ ಉತ್ತರ ನಜಿಮಾಬಾದ್‌ನಲ್ಲಿ ಸಮಾಧಿ ಕಾವಲುಗಾರ ಮುಹಮ್ಮದ್ ರಿಜ್ವಾನ್ ಎಂಬಾತನನ್ನು ಬಂಧಿಸಲಾಗಿತ್ತು. 48 ಮಹಿಳೆಯರ ಶವಗಳ ಮೇಲೆ ಅತ್ಯಾಚಾರ ಎಸಗಿದ್ದಾಗಿ ಆತ ಒಪ್ಪಿಕೊಂಡಿದ್ದ. ಇತ್ತೀಚಿನ ದಿನಗಳಲ್ಲಿ ಇಂತಹ ಶವ ಸಂಭೋಗದ ಕೃತ್ಯಗಳು ಏರಿಕೆಯಾಗುತ್ತಿರುವುದು ಪಾಕಿಸ್ತಾನದ ಜನ ಸಾಮಾನ್ಯರಲ್ಲಿ ಆತಂಕ ಮೂಡಿಸಿದೆ ಎಂದು ಹೇಳಿದ್ದರು.
ಆದರೆ ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಂಡಿರುವಂತೆ ಪಾಕಿಸ್ತಾನದಲ್ಲಿ ಶವ ಸಂಭೋಗ ಘಟನೆಗಳು ನಡೆಯದಂತೆ ತಡೆಯಲು ಮೃತ ಹೆಣ್ಣು ಮಕ್ಕಳ ಸಮಾಧಿಗೆ ಕುಟುಂಬದವರು ಬೀಗ ಹಾಕಿ ಕಾಪಾಡಿಕೊಳ್ಳುತ್ತಿದ್ದಾರೆ ಎಂಬುದು ನಿಜವಲ್ಲ ಎಂಬುದು ಸ್ಪಷ್ಟವಾಗಿದೆ.
ಒಟ್ಟಾರೆಯಾಗಿ ಹೇಳುವುದಾದರೆ, 2011ರ ಹಿಂದೆ ಪಾಕ್‌ನಲ್ಲಿ ಶವಗಳ ಮೇಲೆ ಅತ್ಯಾಚಾರ ಎಸಗಲಾಗಿತ್ತು ಎಂಬ ವರದಿಗಳು ನಿಜ ಆದರೆ, ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿರುವ ಗೋರಿಗೆ ಬೀಗ ಹಾಕಿರುವ ಚಿತ್ರಕ್ಕೂ, ಪಾಕಿಸ್ತಾನಕ್ಕೂ ಸಂಬಂಧವಿಲ್ಲ. ಹಾಗಾಗಿ ಪೋಸ್ಟ್‌ನಲ್ಲಿ ಮಾಡಲಾದ ಪ್ರತಿಪಾದನೆ ತಪ್ಪಾಗಿದೆ.
ನಿಮ್ಮ ಸುತ್ತಮುತ್ತ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಯಾವುದೇ ಸುದ್ದಿಯು ಸುಳ್ಳು ಎಂದು ನಿಮಗೆ ಸಂದೇಹ ಬಂದಿದ್ದರೆ ಅದನ್ನು Ensuddi.com ವಾಟ್ಸಾಪ್ ನಂ 9108969301 ಗೆ ತಲುಪಿಸಿ. ನಾವು ಫ್ಯಾಕ್ಟ್‌ಚೆಕ್ ಮಾಡಿ ಸತ್ಯ ನಿಮ್ಮೆದುರು ಇಡುತ್ತೇವೆ
ಇದನ್ನು ಓದಿರಿ : FACT CHECK | ಬೆಂಗಳೂರಿನ BMTC ಬಸ್‌ಅನ್ನು ಮ್ಯಾಗ್ನೆಟಿಕ್ ಬಾಂಬ್ ದಾಳಿಯಿಂದ ಸ್ಪೋಟಿಸಲಾಗಿತ್ತು ಎಂದು ಸುಳ್ಳು ಫೋಸ್ಟ್‌ ಹಂಚಿಕೆ
