ಶಿಕ್ಷಕಿಯರಿಗೆ ಆನ್ಲೈನ್ ಕ್ಲಾಸ್ನಲ್ಲೇ ಲೈಂಗಿಕ ಕಿರುಕುಳ: ದೂರು ದಾಖಲು!
ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ದಿನದಿಂದ ದಿನಕ್ಕೆ ಸೈಬರ್ ಕ್ರೈಂ ಪ್ರಕರಣಗಳು ಹೆಚ್ಚಾಗುತ್ತಲೇ ಇವೆ. ಅದರಲ್ಲೂ ಲಾಕ್ಡೌನ್ ಸಡಿಲಿಕೆಯಾದ ನಂತರ ಇವುಗಳ ಪ್ರಮಾಣ ಮತ್ತಷ್ಟು ಹೆಚ್ಚಾಗಿದೆ. ಅಲ್ಲದೆ, ಕೊರೊನಾ ಸೋಂಕಿನ ಆಕ್ರಮಣದಿಂದಾಗಿ ಶಾಲಾ-ಕಾಲೇಜುಗಳನ್ನು ತೆರೆಯದಿರಲು ನಿರ್ಧರಿಸಿದ್ದು, ಆನ್ಲೈನ್ ಕ್ಲಾಸ್ಗಳನ್ನು ಮಾಡಲಾಗುತ್ತಿದೆ. ಆದರೆ, ಇತ್ತೀಚೆಗೆ ಆನ್ಲೈನ್ ಪಾಠ ಮಾಡುವ ಉಪನ್ಯಾಸಕಿಯರಿಗೆ ಕಿರುಕುಳ ನೀಡುತ್ತಿರುವ ಆರೋಪಗಳು ಕೇಳಿ ಬಂದಿವೆ.
ವಿದ್ಯಾರ್ಥಿಗಳ ವಿದ್ಯಾಭ್ಯಾಸ ಉಪಯೋಗಕ್ಕಾಗಿ ಆನ್ಲೈನ್ ತರಗತಿಗಳನ್ನು ಅನೇಕ ಕಾಲೇಜು ಮಂಡಳಿಗಳು ನಡೆಸುತ್ತಿವೆ. ಆದರೆ, ಈ ಆನ್ಲೈನ್ ಕ್ಲಾಸ್ಗಳಲ್ಲಿಯೇ ವಿದ್ಯಾರ್ಥಿಗಳು ಉಪನ್ಯಾಸಕಿಯರ ಜೊತೆ ಅನುಚಿತವಾಗಿ ವರ್ತನೆ ಮಾಡುತ್ತಿದ್ದಾರೆ ಎನ್ನಲಾಗಿದೆ.
ಆನೇಕಲ್ ತಾಲೂಕಿನ ಜಿಗಣಿ ಹೋಬಳಿಯಲ್ಲಿರೋ ಆಯುರ್ವೇದಿಕ್ ಮೆಡಿಕಲ್ ಕಾಲೇಜಿನಲ್ಲಿ ಝೂಮ್ ಆ್ಯಪ್ ಮೂಲಕ ಆನ್ಲೈನ್ ತರಗತಿ ನಡೆಸುತ್ತಿದ್ದ ವೈದ್ಯಕೀಯ ಉಪನ್ಯಾಸಕಿ ಬಳಿ ಯುವಕ ಅಸಭ್ಯ ವರ್ತನೆ ಮಾಡಿರುವ ಆರೋಪ ಕೇಳಿ ಬಂದಿದೆ. ಕ್ಲಾಸ್ ವೇಳೆ ಯುವಕ ಆ ಉಪನ್ಯಾಸಕಿಗೆ ಅಸಭ್ಯ ಲೈಂಗಿಕ ಪದ ಬಳಕೆ ಮಾಡಿದ್ದಾನೆ ಎಂದು ಕೇಳಿಬಂದಿದೆ.
ಸದ್ಯ ಜಿಗಣಿ ಪೋಲೀಸ್ ಠಾಣೆಯಲ್ಲಿ ಉಪನ್ಯಾಸಕಿ ದೂರು ನೀಡಿದ್ದು, ಎಫ್ಐಆರ್ ದಾಖಲಾಗಿದೆ.
ಇದಷ್ಟೇ ಅಲ್ಲ, ರಾಜಧಾನಿಯಲ್ಲಿ ಆನ್ಲೈನ್ ಫ್ರಾಡ್ ಹೆಚ್ಚಾಗಿದೆ. ಟ್ರಾವೆಲ್ ಆಫರ್, ಗಿಪ್ಟ್, ಪೋನ್ ಕಾಲ್ ಮೂಲಕ ಪಂಗನಾಮ ಹಾಕುತ್ತಿರುವ, ಬಣ್ಣ ಬಣ್ಣದ ಮಾತುಗಳಿಂದ ನಂಬಿಸಿ ವಂಚನೆ ಮಾಡುತ್ತಿರುವ ಪ್ರಕರಣಗಳು ಬೆಳಕಿಗೆ ಬರುತ್ತಲೇ ಇವೆ.
ಇತ್ತೀಚೆಗೆ, ಜನವರಿ ತಿಂಗಳಲ್ಲಿ 321, ಫೆಬ್ರವರಿಯಲ್ಲಿ 480, ಮಾರ್ಚ್ನಲ್ಲಿ 875, ಏಪ್ರಿಲ್ನಲ್ಲಿ 425 ಮತ್ತು ಮೇ ತಿಂಗಳಲ್ಲಿ 822 ಸೈಬರ್ ಪ್ರಕರಣಗಳು ದಾಖಲಾಗಿದೆ. ಕಳೆದ ತಿಂಗಳೇ ಅತಿ ಹೆಚ್ಚು ಸೈಬರ್ ಅಪರಾಧ ನಡೆದಿರುವುದಾಗಿ ತಿಳಿದುಬಂದಿದೆ.