FACT CHECK | ‘ಭಾರತದ ಸಂಸತ್ತಿನಲ್ಲಿ ನಮ್ಮ ಜನ ಕುಳಿತಿದ್ದಾರೆ’ ಎಂದು ಹೇಳಿದ್ರಾ ಪಾಕಿಸ್ತಾನದ ಬಿಲಾವಲ್ ಭುಟ್ಟೋ ಜರ್ದಾರಿ
‘ಭಾರತದ ಸಂಸತ್ತಿನಲ್ಲಿ ನಮ್ಮ ಜನ ಕುಳಿತಿದ್ದಾರೆ’ ಎಂದು ಪಾಕಿಸ್ತಾನ ಪೀಪಲ್ಸ್ ಪಾರ್ಟಿ ಅಧ್ಯಕ್ಷ ಬಿಲಾವಲ್ ಭುಟ್ಟೋ ಜರ್ದಾರಿ ಅವರು ತಮ್ಮ ದೇಶದ ರಾಷ್ಟ್ರೀಯ ಅಸೆಂಬ್ಲಿಯನ್ನುದ್ದೇಶಿಸಿ ಮಾತನಾಡುವಾಗ ಹೇಳಿದ್ದಾರೆ ಎಂದು ಹೇಳಿಕೆಯೊಂದನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಳ್ಳಲಾಗುತ್ತಿದೆ.
![]()
ಇನ್ನು ಕೆಲವು ಬಳಕೆದಾರರು ಇದೇ ವಿಚಾರಕ್ಕೆ ಸಂಬಂಧಿಸಿದಂತೆ, ವಿಡಿಯೋವೊಂದನ್ನು ಹಂಚಿಕೊಳ್ಳುತ್ತಿದ್ದಾರೆ. ಆ ವೀಡಿಯೋದಲ್ಲಿ “ರಾತ್ರಿಯ ಕತ್ತಲೆಯಲ್ಲಿ ಯಾರು ದಾಳಿ ಮಾಡುತ್ತಾರೆ? ನಾವು ಸಂಸತ್ತಿನಲ್ಲಿ ಭಾರತದ ಪ್ರಧಾನಿಯ ಮುಂದೆಯೂ ನಮ್ಮ ಪ್ರಚಾರವನ್ನು ಹರಡಬಹುದು… ನಮ್ಮ ಜನರು ಅವರ (ಭಾರತೀಯ) ಸಂಸತ್ತಿನಲ್ಲಿ ಕುಳಿತಿದ್ದಾರೆ” ಎಂದು ಭುಟ್ಟೋ ಜರ್ದಾರಿ ಪಾಕಿಸ್ತಾನ ಸಂಸತ್ತನ್ನು ಉದ್ದೇಶಿಸಿ ಹೇಳುತ್ತಿರುವುದನ್ನು ಸ್ಪ್ಲಿಟ್ ಸ್ಕ್ರೀನ್ ದೃಶ್ಯಾವಳಿ ತೋರಿಸುತ್ತದೆ. ಇದರ ಜೊತೆಗೆ, ಈ ಕ್ಲಿಪ್ನಲ್ಲಿ ಕಾಂಗ್ರೆಸ್ ನಾಯಕ ಗೌರವ್ ಗೊಗೊಯ್ ಅವರು ಇತ್ತೀಚೆಗೆ ಆಪರೇಷನ್ ಸಿಂಧೂರ್ ಕುರಿತು ಲೋಕಸಭೆಯಲ್ಲಿ ಮಾಡಿದ ಭಾಷಣವನ್ನೂ ತೋರಿಸಲಾಗಿದೆ.
![]()
ಇದೇ ರೀತಿಯ ಹೇಳಿಕೆಗಳನ್ನು ಇಲ್ಲಿ, ಇಲ್ಲಿ ಮತ್ತು ಇಲ್ಲಿ ನೋಡಬಹುದು. ಹಾಗಿದ್ದರೆ ಪೋಸ್ಟ್ನಲ್ಲಿ ಮಾಡಿದ ಪ್ರತಿಪಾದನೆ ನಿಜವೇ ಎಂದು ಪರಿಶೀಲಿಸೋಣ.
ಫ್ಯಾಕ್ಟ್ಚೆಕ್ :
ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಳ್ಳಲಾಗುತ್ತಿರುವ ಪೋಸ್ಟ್ನಲ್ಲಿ ಮಾಡಿದ ಪ್ರತಿಪಾದನೆಯನ್ನು ಪರಿಶೀಲಿಸಲು, “Bilawal Bhutto,” “people” ಮತ್ತು “Indian Parliament” ಎಂಬ ಕೀ ವರ್ಡ್ಗಳನ್ನು ಬಳಸಿಕೊಂಡು ಗೂಗಲ್ ಸರ್ಚ್ ಮಾಡಿದಾಗ ವೈರಲ್ ಹೇಳಿಕೆಯನ್ನು ಬೆಂಬಲಿಸುವ ಯಾವುದೇ ವಿಶ್ವಾಸಾರ್ಹ ವರದಿಗಳು ಲಭ್ಯವಾಗಿಲ್ಲ.
ನಂತರ ಬಿಲಾವಲ್ ಭುಟ್ಟೋ ಅವರನ್ನು ತೋರಿಸುವ ವೀಡಿಯೋದ ಕೀಫ್ರೇಮ್ಗಳನ್ನು ತೆಗೆದು ಗೂಗಲ್ ರಿವರ್ಸ್ ಇಮೇಜಸ್ನಲ್ಲಿ ಸರ್ಚ್ ಮಾಡಿದಾಗ, ಪಿಟಿವಿ ಪಾರ್ಲಿಮೆಂಟ್ನ ಯೂಟ್ಯೂಬ್ ಪೋಸ್ಟ್ ಲಭ್ಯವಾಗಿದೆ. ಮೇ 7, 2025 ರಂದು ಪಾಕಿಸ್ತಾನ ರಾಷ್ಟ್ರೀಯ ಅಸೆಂಬ್ಲಿಯಲ್ಲಿ ನಡೆದ ಕಲಾಪಗಳ ನೇರ ಪ್ರಸಾರವನ್ನು ಒಳಗೊಂಡಿತ್ತು.
![]()
ವೀಡಿಯೋ ಆರಂಭವಾದ 41:14 ನಿಮಿಷಗಳ ಸುಮಾರಿಗೆ, ಭುಟ್ಟೋ ಭಾರತದ ಆಪರೇಷನ್ ಸಿಂಧೂರ್ ಬಗ್ಗೆ ಸಭೆಯನ್ನು ಉದ್ದೇಶಿಸಿ ಮಾತನಾಡುವುದನ್ನು ಕೇಳಬಹುದು “…ರಾತ್ರಿಯ ಕತ್ತಲೆಯಲ್ಲಿ ಯಾರು ದಾಳಿ ಮಾಡುತ್ತಾರೆ? ಕಳ್ಳರು ರಾತ್ರಿಯ ಕತ್ತಲೆಯಲ್ಲಿ ದಾಳಿ ಮಾಡುತ್ತಾರೆ. ಹೇಡಿಗಳು ರಾತ್ರಿಯ ಕತ್ತಲೆಯಲ್ಲಿ ದಾಳಿ ಮಾಡುತ್ತಾರೆ. ಅವರಿಗೆ ಧೈರ್ಯವಿದ್ದರೆ, ಅವರು ಹಗಲು ಹೊತ್ತಿನಲ್ಲಿ ಯುದ್ಧ ಘೋಷಿಸುತ್ತಿದ್ದರು.” ಎಂದಿದೆ.
ಲೈವ್ ಸ್ಟ್ರೀಮ್ನ ಈ ಭಾಗದ ದೃಶ್ಯಗಳು ವೈರಲ್ ವೀಡಿಯೋದಲ್ಲಿ ಕಂಡುಬರುವ ದೃಶ್ಯಕ್ಕೆ ಹೋಲುತ್ತವೆ ಎಂದು ಕಂಡುಬಂದಿದೆ. ಆದಾಗ್ಯೂ, ಪಾಕಿಸ್ತಾನಿ ನಾಯಕ “ಭಾರತೀಯ ಸಂಸತ್ತಿನಲ್ಲಿ ನಮ್ಮ ಜನರು” ಎಂದಿದ್ದಾರೆ ಎನ್ನುವ ಹೇಳಿಕೆ ಕಂಡುಬಂದಿಲ್ಲ.
ಎರಡೂ ದೃಶ್ಯಗಳ ನಡುವಿನ ಹೋಲಿಕೆಯನ್ನು ಈ ಕೆಳಗೆ ನೋಡಬಹುದು.
![]()
ಇದಲ್ಲದೆ, ಪಾಕಿಸ್ತಾನದ ರಾಷ್ಟ್ರೀಯ ಅಸೆಂಬ್ಲಿಯ ಅಧಿಕೃತ ಯೂಟ್ಯೂಬ್ ಚಾನೆಲ್ ಕೂಡ ಮೇ 7, 2025 ರಂದು ಅವರ ಭಾಷಣವನ್ನು ಹಂಚಿಕೊಂಡಿದೆ. ಇದರಲ್ಲಿಯೂ ಸಹ ಆಪಾದಿತ ಹೇಳಿಕೆ ಇರಲಿಲ್ಲ, ಇದು ವೈರಲ್ ಕ್ಲಿಪ್ ಅನ್ನು ತಿರುಚಲಾಗಿದೆ ಎಂದು ದೃಢಪಡಿಸುತ್ತದೆ.
ವೈರಲ್ ಕ್ಲಿಪ್ ಅನ್ನು ಸೂಕ್ಷ್ಮವಾಗಿ ಗಮನಿಸಿದಾಗ, ಭುಟ್ಟೋ ಅವರ ತುಟಿ ಚಲನೆಗಳು ಆಡಿಯೋಕ್ಕಿಂತ ಭಿನ್ನವಾಗಿರುವುದನ್ನು ಕಾಣಬಹುದು. ಅನಂತರ ನಾವು ಎಐ ಧ್ವನಿ ಪತ್ತೆ ಸಾಧನಗಳ ಮೂಲಕ ಆಡಿಯೋ ಕ್ಲಿಪ್ ಅನ್ನು ಪರಿಶೀಲಿಸಿದ್ದೇವೆ. ಹೆಚ್ಚಿನ ಎಐ ಪತ್ತೆ ಸಾಧನಗಳು ಆಡಿಯೋದ ಚಿಹ್ನೆಗಳನ್ನು ಪತ್ತೆ ಮಾಡದಿದ್ದರೂ, Resemble AI ಧ್ವನಿಯನ್ನು “ನಕಲಿ” ಎಂದು ಪತ್ತೆ ಮಾಡಿದೆ.
ಒಟ್ಟಾರೆಯಾಗಿ ಹೇಳುವುದಾದರೆ, ಭಾರತದ ಸಂಸತ್ತಿನಲ್ಲಿ ನಮ್ಮ ಜನ ಕುಳಿತಿದ್ದಾರೆ ಎಂದು ಬಿಲಾವಲ್ ಭುಟ್ಟೋ ಜರ್ದಾರಿ ಹೇಳುತ್ತಿರುವ ವೈರಲ್ ವಿಡಿಯೋವನ್ನು AI ಮೂಲಕ ಕೃತಕವಾಗಿ ರಚಿಸಿರುವುದು ಸ್ಪಷ್ಟವಾಗಿದೆ. ಹಾಗಾಗಿ ಪೋಸ್ಟ್ನಲ್ಲಿ ಮಾಡಿದ ಪ್ರತಿಪಾದನೆ ತಪ್ಪಾಗಿದೆ.
ನಿಮ್ಮ ಸುತ್ತಮುತ್ತ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಯಾವುದೇ ಸುದ್ದಿಯು ಸುಳ್ಳು ಎಂದು ನಿಮಗೆ ಸಂದೇಹ ಬಂದಿದ್ದರೆ ಅದನ್ನು Ensuddi.com ವಾಟ್ಸಾಪ್ ನಂ 9108969301 ಗೆ ತಲುಪಿಸಿ. ನಾವು ಫ್ಯಾಕ್ಟ್ಚೆಕ್ ಮಾಡಿ ಸತ್ಯ ನಿಮ್ಮೆದುರು ಇಡುತ್ತೇವೆ
ಇದನ್ನು ಓದಿರಿ : FACT CHECK | ಕಾಶ್ಮೀರದಲ್ಲಿ ಸೇನಾ ವಾಹನಕ್ಕೆ ಕಲ್ಲು ತೂರುತ್ತಿದ್ದಾರೆ ಎಂದು ಕೀನ್ಯಾದ ವಿಡಿಯೋ ಹಂಚಿಕೆ

