FACT CHECK | ಪಾಕ್ ನೀರನ್ನು ತಡೆಯಲು ಹೋಗಿ ಭಾರತದ ಅಣೆಕಟ್ಟು ಕುಸಿದಿದೆಯೇ?
ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ಪರಿಣಾಮವಾಗಿ, ಭಾರತವು ಚೆನಾಬ್ ನದಿಯ ಬಾಗ್ಲಿಹಾರ್ ಅಣೆಕಟ್ಟಿನ ಮೂಲಕ ನೀರು ಹರಿಯುವುದನ್ನು ತಾತ್ಕಾಲಿಕವಾಗಿ ನಿಲ್ಲಿಸಿದ ನಂತರ, ಕೇಂದ್ರವು ಜಮ್ಮು ಮತ್ತು ಕಾಶ್ಮೀರದ ಕಿಶನ್ಗಂಗಾ ಅಣೆಕಟ್ಟಿನಲ್ಲೂ ಅದೇ ರೀತಿ ಮಾಡಲು ಯೋಜಿಸುತ್ತಿದೆ ಎಂದು ವರದಿಯಾಗಿದೆ.
ಈಗ, ಪಾಕಿಸ್ತಾನ ಮೂಲದ ಅನೇಕ ಸಾಮಾಜಿಕ ಮಾಧ್ಯಮ ಬಳಕೆದಾರರು ಅಣೆಕಟ್ಟಿನ ಗೇಟ್ಗಳು ಕುಸಿದಿವೆ ಎಂದು ಹೇಳಲಾದ ಭಾರತೀಯ ಟಿವಿ ಸುದ್ದಿ ವರದಿಯ ವೀಡಿಯೊವನ್ನು ಹಂಚಿಕೊಳ್ಳುತ್ತಿದ್ದಾರೆ. ಇದು ಕಿಶನ್ಗಂಗಾ ಅಣೆಕಟ್ಟು ಎಂದು ಹೇಳಿಕೊಳ್ಳುತ್ತಿದ್ದಾರೆ ವೀಡಿಯೊದಲ್ಲಿನ ಹಿನ್ನಲೆ ಧ್ವನಿಯಲ್ಲು ಅದನ್ನೇ ಹೇಳಲಾಗಿದೆ.
ಇದೇ ವೀಡಿಯೊವನ್ನು ಎಕ್ಸ್ ಬಳಕೆದಾರರು ಹಂಚಿಕೊಂಡಿದ್ದು“ ಕಿಶನ್ಗಂಗಾ ಅಣೆಕಟ್ಟಿನಲ್ಲಿ ನೀರನ್ನು ನಿರ್ಬಂಧಿಸಲು ಭಾರತದ ಕ್ರಮವು ಸರಿಯಲ್ಲ ಎಂದು ಸಾಭೀತು ಪಡಿಸಿದೆ. ಅಣೆಕಟ್ಟು ಗೇಟ್ಗಳು ಒತ್ತಡವನ್ನು ತಡೆದುಕೊಳ್ಳಲು ಸಾಧ್ಯವಾಗದೆ ಒಡೆದುಕೊಂಡಿವೆ” ಎಂದು ಬರೆದಿದ್ದಾರೆ. ಹಾಗಿದ್ದರೆ ಪೋಸ್ಟ್ನಲ್ಲಿ ಮಾಡಿದ ಪ್ರತಿಪಾದನೆ ನಿಜವೇ ಎಂದು ಪರಿಶೀಲಿಸೋಣ.
ಫ್ಯಾಕ್ಟ್ಚೆಕ್ :
ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಳ್ಳಲಾಗುತ್ತಿರುವ ಪೋಸ್ಟ್ನಲ್ಲಿ ಮಾಡಿದ ಪ್ರತಿಪಾದನೆಯನ್ನು ಪರಿಶೀಲಿಸಲು ವಿಡಿಯೋದ ಕೀಫ್ರೇಮ್ಗಳನ್ನು ಪರಿಶೀಲಿಸಲು ಗೂಗಲ್ ರವರ್ಸ್ ಇಮೇಜಸ್ನಲ್ಲಿ ಸರ್ಚ್ ಮಾಡಿದಾಗ, ಮೇ 16, 2019 ರಂದು ಯುಎಸ್ ಮೂಲದ ಸುದ್ದಿ ಚಾನೆಲ್ CBS17 ನ ಯೂಟ್ಯೂಬ್ಗೆ ಅಪ್ಲೋಡ್ ಮಾಡಲಾದ ವೀಡಿಯೊ ಲಭ್ಯವಾಗಿದೆ. ಅದರ ವಿವರಣೆಯಲ್ಲಿ ಯುಎಸ್ನ ಟೆಕ್ಸಾಸ್ನಲ್ಲಿರುವ ಲೇಕ್ ಡನ್ಲಾಪ್ನಲ್ಲಿ ಅಣೆಕಟ್ಟು ಕುಸಿದಿದೆ ಎಂದು ಹೇಳಲಾಗಿದೆ.
ಮೇ 14, 2019 ರ ದಿನಾಂಕವನ್ನು ಸಿಸಿ ಕ್ಯಾಮೆರಾದ ದೃಶ್ಯಗಳ ಮೇಲಿನ ಎಡಭಾಗದಲ್ಲಿ ಕಾಣಬಹುದು. ಮತ್ತೊಂದೆಡೆ, “ಗ್ವಾಡಲುಪೆ-ಬ್ಲಾಂಕೊ ನದಿ ಪ್ರಾಧಿಕಾರ” ಎಂಬ ಪದಗಳನ್ನು ಬರೆಯಲಾಗಿದೆ. ವೈರಲ್ ವೀಡಿಯೊದಲ್ಲಿ, ಇವೆರಡನ್ನೂ ಆನ್-ಸ್ಕ್ರೀನ್ ಗ್ರಾಫಿಕ್ಸ್ ಮರೆಮಾಡಿದೆ. CBS17 ವೀಡಿಯೊದ ಕೆಳಗಿನ ಬಲ ಮೂಲೆಯಲ್ಲಿ “ಡನ್ಲಾಪ್_ಡ್ಯಾಮ್” ನ ವಾಟರ್ಮಾರ್ಕ್ ಇದೆ. ಈ ಭಾಗವನ್ನು ವೈರಲ್ ಕ್ಲಿಪ್ನಲ್ಲಿ ಕತ್ತರಿಸಲಾಗಿದೆ.
ಈ ಘಟನೆಯ ಕುರಿತು ಮೇ 2019 ರ ಹಲವಾರು ಸುದ್ದಿ ವರದಿಗಳು ಲಭ್ಯವಾಗಿದ್ದು, ಅವುಗಳಲ್ಲಿ CNN ಮತ್ತು ABC ನ್ಯೂಸ್ ಸೇರಿವೆ. ಎರಡೂ ವರದಿಗಳು ವೀಡಿಯೊವನ್ನು ಒಳಗೊಂಡಿವೆ.
ಈ ವರದಿಗಳ ಪ್ರಕಾರ, ಈ ವೀಡಿಯೊ ಟೆಕ್ಸಾಸ್ನಿಂದ ಬಂದಿದ್ದು, ಅಲ್ಲಿ ಮೇ 14, 2019 ರಂದು ಡನ್ಲಾಪ್ ಸರೋವರದಲ್ಲಿ ಸೋರಿಕೆಯಿಂದಾಗಿ ಈ ಘಟನೆ ಸಂಭವಿಸಿದೆ. ವರದಿಯ ಪ್ರಕಾರ, ಅಧಿಕಾರಿಗಳು ಇದನ್ನು “ಭಾಗಶಃ ಅಣೆಕಟ್ಟು ವೈಫಲ್ಯ” ಎಂದು ಕರೆದರು. ಕುಸಿತದಿಂದಾಗಿ ಸರೋವರದ ನೀರಿನ ಮಟ್ಟವು ಮುಂದಿನ ಗಂಟೆಗಳಲ್ಲಿ ಸುಮಾರು ಮೂರು ಮೀಟರ್ಗಳಷ್ಟು ಕಡಿಮೆಯಾಯಿತು. ಅಣೆಕಟ್ಟು ಸುಮಾರು 91 ವರ್ಷ ಹಳೆಯದು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಈ ಘಟನೆಯ ನಂತರ ನಿವಾಸಿಗಳು ತಮ್ಮ ನೀರಿನ ಬಳಕೆಯನ್ನು ಕಡಿಮೆ ಮಾಡುವಂತೆ ಎಚ್ಚರಿಸಲಾಗಿದ್ದರಿಂದ, ಸ್ಥಳೀಯ ಜಲ ಸಂರಕ್ಷಣಾ ಪ್ರಾಧಿಕಾರವಾದ ಗ್ವಾಡಾಲುಪೆ-ಬ್ಲಾಂಕೊ ನದಿ ಪ್ರಾಧಿಕಾರವು ಸುರಕ್ಷತಾ ಕ್ರಮಗಳನ್ನು ವಹಿಸಿತ್ತು ಎಂದು ತಿಳಿದುಬಂದಿದೆ.
ಒಟ್ಟಾರೆಯಾಗಿ ಹೇಳುವುದಾದರೆ, ಯುಎಸ್ನಲ್ಲಿ ಅಣೆಕಟ್ಟು ಗೇಟ್ ಕುಸಿತದ 2019 ರ ವೀಡಿಯೊವನ್ನು ಭಾರತದ ಕಿಶನ್ಗಂಗಾ ಅಣೆಕಟ್ಟು ಎಂದು ತಪ್ಪಾಗಿ ಹಂಚಿಕೊಳ್ಳಲಾಗಿದೆ ಎಂಬುದು ಸ್ಪಷ್ಟವಾಗಿದೆ. ಕಿಶನ್ಗಂಗಾ ಅಣೆಕಟ್ಟು ಗೇಟ್ಗಳು ಕುಸಿದಿರುವ ಯಾವುದೇ ವಿಶ್ವಾಸಾರ್ಹ ಸುದ್ದಿ ವರದಿಗಳು ಲಭ್ಯವಾಗಿಲ್ಲ. ಹೀಗಾಗಿ ಪೋಸ್ಟ್ನಲ್ಲಿ ಮಾಡಿದ ಪ್ರತಿಪಾದನೆ ತಪ್ಪಾಗಿದೆ.
ನಿಮ್ಮ ಸುತ್ತಮುತ್ತ ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ ಯಾವುದೇ ಸುದ್ದಿಯು ಸುಳ್ಳು ಎಂದು ನಿಮಗೆ ಸಂದೇಹ ಬಂದಿದ್ದರೆ ಅದನ್ನು Ensuddi.com ವಾಟ್ಸಾಪ್ ನಂ 9108969301 ಗೆ ತಲುಪಿಸಿ. ನಾವು ಫ್ಯಾಕ್ಟ್ಚೆಕ್ ಮಾಡಿ ಸತ್ಯ ನಿಮ್ಮೆದುರು ಇಡುತ್ತೇವೆ
ಇದನ್ನು ಓದಿರಿ : FACT CHECK | ಗಾಜಾ ದಾಳಿಯ ಹಳೆಯ ವಿಡಿಯೋವನ್ನು ಆಪರೇಷನ್ ಸಿಂಧೂರ್ ದಾಳಿ ಎಂದು ತಪ್ಪಾಗಿ ಹಂಚಿಕೆ

