FACT CHECK : ಯುವತಿಯರಿಗೆ ಕಿರುಕುಳ ನೀಡಿದಕ್ಕೆ ಮುಸ್ಲಿಂ ಹುಡುಗರಿಗೆ ಲಾಠಿ ಏಟು ಎಂದು ಸಂಬಂಧವಿಲ್ಲ ವಿಡಿಯೋ ಹಂಚಿಕೆ
ಹುಡುಗಿಯರಿಗೆ ಕಿರುಕುಳ ನೀಡಿದ್ದಕ್ಕಾಗಿ ಮುಸ್ಲಿಂ ಯುವಕರಾದ ಎಂ.ಡಿ. ಸಮೀರ್, ನದೀಮ್ ಮತ್ತು ಆಸಿಫ್ ಅಲಿ ಅವರನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ಪ್ರತಿಪಾದಿಸಿ ಸಾಮಾಜಿಕ ಮಾಧ್ಯಮಗಳಲ್ಲಿ ವಿಡಿಯೋವನ್ನು ಹಂಚಿಕೊಳ್ಳಲಾಗುತ್ತಿದೆ. ಮೂವರು ಯುವಕರ ಕೈಗಳನ್ನು ಹಗ್ಗದಿಂದ ಕಟ್ಟಿ ಪೊಲೀಸರು ಲಾಠಿಯಿಂದ ಹೊಡೆಯುತ್ತಿರುವುದನ್ನು ಕಾಣಬಹುದು. ಮೂವರು ಯುವಕರನ್ನು ಪೊಲೀಸರು ಬೀದಿಗಳಲ್ಲಿ ಕರೆದುಕೊಂಡು ಹೋಗುತ್ತಿರುವ ವೀಡಿಯೊ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದೆ.

ಈ ವೀಡಿಯೊವನ್ನು ಹಂಚಿಕೊಂಡಿರುವ ಫೇಸ್ಬುಕ್ ಬಳಕೆದಾರರೊಬ್ಬರು , ‘‘ಎಂಡಿ ಸಮೀರ್, ನದೀಮ್ ಮತ್ತು ಆಸಿಫ್ ಅಲಿ ಕೆಲಸ – ಮನೆಯ ಹೊರಗೆ ಹುಡುಗಿಯರಿಗೆ ಕಿರುಕುಳ ಅವರವರ ಮನೆಯ ಮುಂದೆ ಪೊಲೀಸರು ದಂಡಂ ದಶಗುಣಂ’’ ಎಂದು ಬರೆದುಕೊಂಡಿದ್ದಾರೆ. ಹಾಗಿದ್ದರೆ ಪೋಸ್ಟ್ನಲ್ಲಿ ಮಾಡಿದ ಪ್ರತಿಪಾದನೆ ನಿಜವೇ ಎಂದು ಪರಿಶೀಲಿಸೋಣ.
ಫ್ಯಾಕ್ಟ್ಚೆಕ್ :
ಮುಸ್ಲಿಂ ಯುವಕರಿಂದ ಯುವತಿಯರಿಗೆ ಕಿರುಕುಳ ಎಂಬ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆದ ವಿಡಿಯೋದ ಸತ್ಯಾಸತ್ಯತೆಯನ್ನು ಪರಿಶೀಲಿಸಲು, ವೈರಲ್ ವೀಡಿಯೊದ ಕೀಫ್ರೇಮ್ಗಳನ್ನು ಗೂಗಲ್ ಲೆನ್ಸ್ ಸಹಾಯದಿಂದ ಪರಿಶೀಲಿಸಿದಾಗ, ಇದೇ ರೀತಿಯ ದೃಶ್ಯವನ್ನು ಒಳಗೊಂಡಂತೆ MP Talk ತನ್ನ ಯೂಟ್ಯೂಬ್ ಪುಟದಲ್ಲಿ ಹಂಚಿಕೊಂಡ ವರದಿ ಕಂಡುಬಂದಿದೆ. ಏಪ್ರಿಲ್ 20 ರಂದು ಹಂಚಿಕೊಂಡ ವರದಿಯ ಪ್ರಕಾರ, ಮಧ್ಯಪ್ರದೇಶದ ಉಜ್ಜಯಿನಿಯಲ್ಲಿ ಕಲ್ಲು ತೂರಾಟ ಮತ್ತು ಹಿಂಸಾಚಾರ ಎಸಗಿದ ಆರೋಪಿಗಳನ್ನು ಪೊಲೀಸರು ಬಂಧಿಸುತ್ತಿರುವ ದೃಶ್ಯ ಇದಾಗಿದೆ.
ವಾಸ್ತವವಾಗಿ ವಿಡಿಯೋದಲ್ಲಿರುವವರು ಹುಡುಗಿಯರಿಗೆ ಕಿರುಕುಳ ನೀಡಿದಕ್ಕಾಗಿ ಬಂಧಿಸಲ್ಪಟ್ಟ ಮುಸ್ಲಿಂ ಯುವಕರಲ್ಲ, ಬದಲಾಗಿ ಮಧ್ಯಪ್ರದೇಶದ ಉಜ್ಜಯಿನಿಯಲ್ಲಿ ಹಿಂಸಾಚಾರ ನಡಿಸಿದಾಗ ಬಂಧಿಸಲ್ಪಟ್ಟ ಮೂವರು ಹುಡುಗರ ವಿಡಿಯೋ ಇದಾಗಿದ್ದು, ಇದರಲ್ಲಿರುವ ಎಲ್ಲರೂ ಹಿಂದೂಗಳು ಎಂಬುದು ಪೊಲೀಸರ ಹೇಳಿಕೆಯಿಂದ ದೃಢಪಟ್ಟಿದೆ.
ಕಾರು ತೊಳೆಯುವ ಕೇಂದ್ರದ ಮಾಲೀಕರೊಂದಿಗೆ ವಾಗ್ವಾದದ ನಂತರ ದಾಳಿಕೋರರು ರಾತ್ರಿಯಲ್ಲಿ ಅವರ ಮನೆ ಮತ್ತು ಸುತ್ತಮುತ್ತಲಿನ ವಾಹನಗಳನ್ನು ಧ್ವಂಸ ಮಾಡಿದ್ದಾರೆ ಎಂದು ವರದಿ ಹೇಳುತ್ತದೆ. ಬಂಧಿತ ಆರೋಪಿಗಳ ಹೆಸರುಗಳು ಕಿಶನ್ ಅಹಿರ್ವಾರ್, ವಿಶಾಲ್ ಮತ್ತು ವಿಕಾಸ್ ಎಂದು ವೀಡಿಯೊ ವರದಿಯಲ್ಲಿ ಹೇಳಲಾಗಿದೆ. ವೀಡಿಯೊವನ್ನು ಕೆಳಗೆ ನೋಡಬಹುದು.
ಮತ್ತಷ್ಟು ಕೀವರ್ಡ್ ಬಳಸಿ ಸರ್ಚ್ ನಡೆಸಿದಾಗ ನವಭಾರತ್ ಟೈಮ್ಸ್ ಪ್ರಕಟಿಸಿದ ವರದಿ ಲಭ್ಯವಾಗಿದೆ. ಅದರಲ್ಲಿ ವೈರಲ್ ವಿಡಿಯೋದ ಸ್ಕ್ರೀನ್ಶಾಟ್ ಕೂಡ ಕಾಣಬಹುದು. ಏಪ್ರಿಲ್ 18 ರಂದು ಪ್ರಕಟವಾದ ವರದಿಯ ಪ್ರಕಾರ, ಏಪ್ರಿಲ್ 16 ರಂದು ಉಜ್ಜಯಿನಿಯ ಬಫ್ನಾ ಪಾರ್ಕ್ ಕಾಲೋನಿಯಲ್ಲಿ ಗಲಭೆ ಸೃಷ್ಟಿಸಿದ್ದ ಮೂವರನ್ನು ಪೊಲೀಸರು ಬಂಧಿಸಿದ್ದಾರೆ. MR-5 ರಸ್ತೆಯಲ್ಲಿ ಕಾರ್ ವಾಶ್ ನಡೆಸುವ ಶೆರಾನ್ ಅಲಿ, ಸಮಯವಿಲ್ಲದ ಕಾರಣ ಯುವಕರ ಕಾರುಗಳನ್ನು ತೊಳೆಯಲು ಸಾಧ್ಯವಿಲ್ಲ ಎಂದು ಅವರಿಗೆ ತಿಳಿಸಿದ್ದರು.
ಏಪ್ರಿಲ್ 16 ರಂದು, ಬೆಳಗಿನ ಜಾವ 2 ಗಂಟೆ ಸುಮಾರಿಗೆ, ದಾಳಿಕೋರರು ಶೆರಾನ್ ಅಲಿಯವರ ಮನೆಗೆ ತಲುಪಿ ಬೆಂಕಿ ಹಚ್ಚಿ ಹಿಂಸಾಚಾರ ನಡೆಸಿದರು. ದಾಳಿಕೋರರು ಆ ಪ್ರದೇಶದಲ್ಲಿ ನಿಲ್ಲಿಸಿದ್ದ ನೆರೆಹೊರೆಯವರಾದ ಅಫ್ರೋಜ್ ಮತ್ತು ಡಾ. ಪ್ರದೀಪ್ ಅಗರ್ವಾಲ್ ಅವರ ಕಾರುಗಳಿಗೂ ಹಾನಿ ಮಾಡಿದರು. ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದ ನಂತರ, ಐದು ಜನರ ವಿರುದ್ಧ ಪ್ರಕರಣ ದಾಖಲಿಸಿದರು. ಅವರಲ್ಲಿ ಮೂವರು, ಕಿಶನ್ ಅಹಿರ್ವಾರ್, ವಿಶಾಲ್ ಮತ್ತು ವಿಕಾಸ್ ಅವರನ್ನು ಏಪ್ರಿಲ್ 17 ರಂದು ಬಂಧಿಸಲಾಯಿತು. ಪೊಲೀಸರು ಹಿಂಸಾಚಾರ ನಡೆದ ಅದೇ ಸ್ಥಳದಲ್ಲಿ ಆರೋಪಿಗಳನ್ನು ಮೆರವಣಿಗೆ ಮಾಡಿ ಲಾಠಿಯಿಂದ ಹೊಡೆದರು ಎಂಬ ಮಾಹಿತಿ ಇದರಲ್ಲಿದೆ.
Akshar Vishwa Ujjain ಎಂಬ ಸ್ಥಳೀಯ ಮಾಧ್ಯಮ ಕೂಡ ಏಪ್ರಿಲ್ 18 ರಂದು ವೈರಲ್ ವೀಡಿಯೊದ ಸ್ಕ್ರೀನ್ ಶಾಟ್ ಜೊತೆ ಸುದ್ದಿ ಪ್ರಕಟಿಸಿದ್ದು, ಉಜ್ಜಯಿನಿಯ ಚಿಮನ್ಗಂಜ್ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿರುವ ಬಫ್ನಾ ಪಾರ್ಕ್ ಪ್ರದೇಶದಲ್ಲಿ ವಾಹನಗಳನ್ನು ಧ್ವಂಸ ಮಾಡಿ ಕಲ್ಲು ತೂರಾಟ ನಡೆಸುತ್ತಿದ್ದ ದುಷ್ಕರ್ಮಿಗಳಿಗೆ ಪೊಲೀಸರು ಕಠಿಣ ಪಾಠ ಕಲಿಸಿದ್ದಾರೆ. ಸಿಸಿಟಿವಿ ದೃಶ್ಯಗಳ ಆಧಾರದ ಮೇಲೆ ಅಪರಾಧಿಗಳನ್ನು ಗುರುತಿಸಿದ ನಂತರ, ಪೊಲೀಸರು ದುಷ್ಕರ್ಮಿಗಳನ್ನು ವಶಕ್ಕೆ ಪಡೆದರು; ಠಾಣೆಯ ಉಸ್ತುವಾರಿ ವಿವೇಕ್ ಕನೋಡಿಯಾ ಅವರ ನೇತೃತ್ವದಲ್ಲಿ ತ್ವರಿತವಾಗಿ ಕಾರ್ಯನಿರ್ವಹಿಸಿದ ತಂಡವು ಶುಕ್ರವಾರ ಮಧ್ಯಾಹ್ನದ ವೇಳೆಗೆ ಕಿಶನ್, ವಿಕಾಸ್ ಮತ್ತು ವಿಶಾಲ್ ಅವರನ್ನು ಬಂಧಿಸಿತು ಎಂದು ಬರೆಯಲಾಗಿದೆ.
ಒಟ್ಟಾರೆಯಾಗಿ ಹೇಳುವುದಾದರೆ, ಹಿಂಸಾಚಾರ ಕೃತ್ಯದಲ್ಲಿ ಭಾಗಿಯಾದ ಕಾರಣಕ್ಕೆ ಬಂಧಿಸಲ್ಪಟ್ಟ ಮೂವರು ಹಿಂದೂ ಯುವಕರ ವಿಡಿಯೋವನ್ನು, ಹುಡುಗಿಯರಿಗೆ ಕಿರುಕುಳ ನೀಡಿದ್ದಕ್ಕಾಗಿ ಮುಸ್ಲಿಂ ಯುವಕರನ್ನು ಪೊಲೀಸರು ಬಂಧಿಸಿದ್ದಾರೆ ತಪ್ಪಾಗಿ ಹಂಚಿಕೊಳ್ಳಲಾಗಿದೆ. ಹಾಗಾಗಿ ಪೋಸ್ಟ್ನಲ್ಲಿ ಮಾಡಿದ ಪ್ರತಿಪಾದನೆ ತಪ್ಪಾಗಿದೆ.
ಇದನ್ನು ಓದಿರಿ : FACT CHECK : ತಮಿಳುನಾಡು DCM ಉದಯನಿಧಿ ಸ್ನೇಹಿತನಿಂದ ಕೋಟ್ಯಾಂತರ ರೂಪಾಯಿ ಅಕ್ರಮ ಹಣ ವಶಪಡಿಸಿಕೊಳ್ಳಲಾಗಿದೆಯೇ?
ನಿಮ್ಮ ಸುತ್ತಮುತ್ತ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಯಾವುದೇ ಸುದ್ದಿಯು ಸುಳ್ಳು ಎಂದು ನಿಮಗೆ ಸಂದೇಹ ಬಂದಿದ್ದರೆ ಅದನ್ನು Ensuddi.com ವಾಟ್ಸಾಪ್ ನಂ 9108969301 ಗೆ ತಲುಪಿಸಿ. ನಾವು ಫ್ಯಾಕ್ಟ್ಚೆಕ್ ಮಾಡಿ ಸತ್ಯ ನಿಮ್ಮೆದುರು ಇಡುತ್ತೇವೆ

