ಇಂಗ್ಲೆಂಡ್ ಪ್ರಧಾನಿಗೆ ತಕ್ಕ ಶಾಸ್ತಿಯಾಗಿದೆ ಎಂದ ಮೇಯರ್ ಪಕ್ಷದಿಂದಲೇ ವಜಾ
ಇಂಗ್ಲೆಂಡ್ ಪ್ರಧಾನಿ ಬೋರಿಸ್ ಜಾನ್ಸನ್ಗೂ ಕೊರೋನಾ ಸೋಂಕು ತಗುಲಿದೆ. ಭಾನುವಾರ ಆಸ್ಪತ್ರೆಗ ದಾಖಲಾಗಿದ್ದ ಅವರ ಆರೋಗ್ಯ ತೀವ್ರ ಹದಗೆಟ್ಟಿತ್ತು. ಹಾಗಾಗಿ ಅವರನ್ನು ಐಸಿಯುಗೆ ಶಿಫ್ಟ್ ಮಾಡಿ ಟ್ರೀಟ್‌ಮೆಂಟ್‌ ನೀಡಲಾಗುತ್ತಿತ್ತು. ಈಗ ಅವರ ಆರೋಗ್ಯ ಸ್ಥಿತಿ ಸುಧಾರಿಸಿದೆ. ಈ ಮಧ್ಯೆ ಸಾಕಷ್ಟು ಜನರು ಅವರು ಗುಣಮುಖರಾಗಲಿ ಎಂದು ಹರಿಸಿದ್ದರು. ಆದರೆ, ಅಲ್ಲಿನ ಮೇಯರ್ ಒಬ್ಬರು ಬೋರಿಸ್ಗೆ ತಕ್ಕ ಶಾಸ್ತಿ ಆಗಿದೆ ಎಂದು ಹೇಳುವ ಮೂಲಕ ಪಕ್ಷದಿಂದಲೇ ವಜಾಗೊಂಡಿದ್ದಾರೆ.
ಕೊರೊನಾ ಸೋಂಕು ಕಾಣಿಸಿದ್ದರಿಂದ ಬೋರಿಸ್ ಆಸ್ಪತ್ರೆಗೆ ದಾಖಲಾಗಿದ್ದರು. ವೈದ್ಯಕೀಯ ಪರೀಕ್ಷೆ ನಡೆಸಿದ ನಂತರ ಅವರಲ್ಲಿ ಕೊರೋನಾ ವೈರಸ್ ಇರುವುದು ದೃಢಪಟ್ಟಿತ್ತು. ಕೇವಲ ಒಂದೇ ದಿನದಲ್ಲಿ ಅವರ ಆರೋಗ್ಯ ತೀವ್ರ ಹದಗೆಟ್ಟಿತ್ತು. ಈ ಹಿನ್ನೆಲೆಯಲ್ಲಿ ಐಸಿಯುಗೆ ಅವರನ್ನು ಶಿಫ್ಟ್ ಮಾಡಲಾಗಿತ್ತು.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೇರಿ ಸಾಕಷ್ಟು ಜನರು ಬೋರಿಸ್ ಬೇಗ ಗುಣಮುಖರಾಗಲಿ ಎಂದು ಪ್ರಾರ್ಥಿಸಿದ್ದರು. ಆದರೆ, ಡರ್ಬಿಶೈರ್ ಜಿಲ್ಲೆಯ ಹೀನರ್ ನಗರದ ಮೇಯರ್ ಶೀಲಾ ಓಕ್ಸ್ ಬೋರಿಸ್ಗೆ ಹಿಡಿ ಶಾಪ ಹಾಕಿದ್ದಾರೆ. ‘ನಾವು ನೋಡಿದ ಅತಿ ಕೆಟ್ಟ ಪ್ರಧಾನಿಗಳಲ್ಲಿ ಬೋರಿಸ್ ಕೂಡ ಒಬ್ಬರು. ಹೀಗಾಗಿ ಅವರಿಗಿದು ಆಗತಕ್ಕಂಥದ್ದೆ’ ಎಂದು ಹೇಳಿದ್ದರು.
ಈ ಹೇಳಿಕೆಗೆ ಭಾರೀ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿ ಶೀಲಾ ಬಹಿರಂಗ ಕ್ಷಮೆಯಾಚಿಸಿದ್ದರು. ಆದರೆ, ಲೇಬರ್ ಪಕ್ಷದ ಮುಖ್ಯಸ್ಥರು ಶೀಲಾ ಅವರನ್ನು ಪಾರ್ಟಿಯಿಂದಲೇ ವಜಾ ಮಾಡಿದ್ದಾರೆ.
